Shyǵys Qazaqstanda jyl basynan beri 14 adam órtten kóz jumdy
ÓSKEMEN. QazAqparat – Shyǵys Qazaqstan oblysynda 2021 jyldyń basynan beri órtten 14 adam qaza bolǵan, dep habarlaıdy QazAqparat tilshisi.
ShQO TJD baspasóz qyzmetiniń málimetine súıensek, óńirde jyl basynan beri turǵyn úı sektoryndaǵy órtterden 37 adam qutqarylyp, 54 adam evakýatsııalandy.
Sondaı-aq tilsiz jaýdan 14 azamat kóz jumǵan.
Onyń ishinde beseýi pesh paıdalaný kezinde órt qaýipsizdigi talaptaryn saqtamaýdan, 8-i otpen abaısyz áreket etýden, 1 turǵyn elektr jabdyqtaryn qoldaný kezinde qaýipsizdik erejelerin buzýdyń saldarynan jan tapsyrdy.
«29 naýryz kúni Semeıdegi páterdi qyzyl jalyn sharpyǵan. Osynyń saldarynan ıis tıgen 1969 jylǵy er adam qaza boldy. Qatty tútin 4-shi qabatty túgel tumshalap alǵan. Jıhaz ben turmystyq tehnıkaǵa jaıylǵan órttiń jalpy aýdany 9 sharshy metrdi qurady. Órttiń shyǵýyna otpen abaısyz áreket etý sebep bolǵan» delingen habarlamada.
Osy rette departament mamandary oblys turǵyndaryna qaýipsizdik erejelerin eske salady:
- Qosýly elektr jáne gaz quraldaryn qaraýsyz qaldyrmańyz;
- Otty abaılap paıdalanyńyz – tósekte jatyp, lodjııa men balkonda temeki shekpeńiz;
- Zaýytta jasalmaǵan elektr saqtandyrǵyshty, jasandy abajýr, jaryqtandyrý shamyn paıdalanbańyz;
- Jertóle men shatyrlarda janǵysh zattardy, túrli turmystyq qoqysty, jıhaz ben qaǵazdy saqtamańyz.
- Qyzyl jalyn shyqqan jaǵdaıda dereý «101» nemese «112» nómirine habarlasyńyz.
Órt qaýipsizdigi erejelerin buzǵany úshin QR ÁQBtK 410-babyna sáıkes ákimshilik jaýapkershilik qarastyrylǵan.
