Shyǵys Qazaqstanda jyl basynan beri 107 kásipkerdiń quqyǵy qorǵaldy

ÓSKEMEN. QazAqparat – Shyǵys Qazaqstan oblysynda sybaılas jemqorlyqqa qarsy qyzmet jyl basynan beri 107 kásipkerdiń quqyǵyn qorǵady, dep habarlaıdy QazAqparat tilshisi.

Bıyldan bastap Sybaılas jemqorlyqqa qarsy is-qımyl agenttiginiń ShQO boıynsha departamenti kásipkerlerdiń quqyǵyn qorǵaý maqsatynda arnaıy joba júzege asyrýda. Bul týraly búgin oblystyq Aqparat ortalyǵynda ótken baspasóz máslıhaty barysynda departament basshysy Denıs Shakenov málim etti.

«Jobanyń maqsaty – kásipkerlerge qujattardy resimdeý kezindegi ákimshilik kedergilerden ótýge kómektesý, memlekettik qyzmetshiler qabyldaıtyn sheshimderdiń merzimderi men ashyqtyǵyn saqtaýdy qamtamasyz etý. Sonyń aıasynda jer nemese qandaı da bir iske ruqsat alý, kommýnıkatsııalarǵa qosylý, memlekettik qoldaý sharalaryn alý kezinde bıznes ókilderi tap bolatyn máselelerdi sheshýmen aınalysýdamyz. Jyl basynan osy ýaqytqa deıin 107 kásipkerdiń quqyǵy qorǵaldy. Bıznes ókilderi ótinishteri men usynystaryn agenttiktiń 1424 Call-ortalyǵyna júginip jetkize alady», - deıdi ol.

Mysaly, Altaı aýdanynda sharýa qojalyq ıeleriniń jer ýchaskelerin jaldaý merzimin uzartý týraly ótinishi negizsiz jer komıssııalarynyń qaraýyna jiberilgen. Al olar avtomatty túrde uzartylýy tıis.

Departamenttiń aralasýymen 3 sharýa qojalyǵynyń jer ýchaskelerin paıdalaný quqyǵy jer komıssııasynyń qaraýynsyz 10 jylǵa uzartyldy.