Shyǵys Qazaqstanda «Jomart júrek» baıqaýynyń jeńimpazdary anyqtaldy

ÓSKEMEN. QazAqparat – Shyǵys Qazaqstan oblysynda qıyn jaǵdaıǵa tap bolǵan jerlesterine kómek kórsetken, áleýmettik mańyzdy jobalardy iske asyryp, qaıyrymdylyq sharalaryna belsene atsalysqan azamattar marapattaldy, dep habarlaıdy QazAqparat tilshisi.

Jyldyń metsenaty atalymy Borodýlıha aýdanynyń turǵyny «Assortı 2» sharýa qojalyǵynyń basshysy Igor Shevchenkoǵa buıyrdy.

Ol qojalyq jumysshylaryna únemi kómektesip, sábıli bolǵandarǵa 100 myń teńgeden kómek kórsetedi.

Jyl saıyn turǵyndarǵa baqsha ósirý, qysta jáne jazda joldardy kútip ustaý, kóktem kezinde sý burý arnalaryn tazartý jumystaryna qolǵabys etedi.

«Sonymen qatar Igor Vıktorovıch bıznes ashqysy keletin kópbalaly analarmen kezdesýlerge belsendi qatysty. Bastamashyl áıelderdiń tálimgerligimen qyzyǵýshylyq tanytqan analar «Іsker ana» baǵdarlamasy boıynsha oqýdan ótip, óz jobalaryn iske asyrý úshin grant aldy» delingen aqparatta.

2020 jyl eldegi volonterlikti damytýǵa úlken serpin boldy. Eren erlik nomınatsııasy boıynsha volonterlik qyzmetke belsendi qatysqany úshin Kýrchatov qalasynyń volonterlik qozǵalys ortalyǵynyń tóraıymy Ásemgúl Kalımoldına syılyq ıegeri atandy.

Ol Kýrchatovtaǵy eriktiler qozǵalysyn keńeıtip, 2 myńnan astam adamdy tarta bildi.

«Balalarǵa júrek syıla», «Qus ashanasy», «Biz birgemiz», «Meıirimdi kórshiler», «Meıirimdi is», «Jaqsylyq joly», «Myń alǵys», «Maska taǵyńyz» volonterlik aktsııalaryn uıymdastyrdy.