Shyǵys Qazaqstanda jol-kólik oqıǵalary 31,6%-ǵa azaıǵan
ÓSKEMEN. QazAqparat – Shyǵys Qazaqstan oblysynda bıyl jol-kólik oqıǵalary 31,6%-ǵa, jol apatynan kóz jumǵandar 27,1%-ǵa azaıǵan, dep habarlaıdy QazAqparat tilshisi.
Bul týraly onlaın formatta halyqqa esep bergen ShQO Polıtsııa departamentiniń bastyǵy Saǵat Mádıev aıtty.
«Kólik júrgizýshilerimen profılaktıkalyq jumysty jandandyrý, joldardy tekserý jáne avarııalyq-qaýipti ýchaskelerdi joıý nátıjesinde oń nátıjelerge qol jetkizildi. Atap aıtqanda, bıyl jol-kólik oqıǵalary 31,6%-ǵa, jol apatynan kóz jumǵandar 27,1%-ǵa, jaraqat alǵandar 32,5%-ǵa azaıǵan. Jol qozǵalysy qaýipsizdigin arttyrý úshin birqatar sharalar atqaryldy. Máselen, Óskemendegi 21 jol qıylysynda júrgizýshilerge solǵa burylýǵa ruqsat beretin arnaıy sektsııalary bar baǵdarshamdar ornatyldy. Sondaı-aq 3 jerústi jaıaý júrginshiler ótkeli salyndy», - dedi ol.
Onyń aıtýynsha, jyl basynan beri Óskemen men Semeı qalalarynda, Samar, Kókpekti aýyldarynda jáne Glýbokoe kentinde 9 baǵdarsham salynǵan. Sonymen qatar respýblıkalyq jáne oblystyq mańyzy bar avtokólik joldaryna komıssııalyq tekserý júrgizilip, tekserý nátıjeleri oblys ákimdigi men prokýratýraǵa qaraýǵa joldandy.
