Shyǵys Qazaqstanda joǵalyp ketken 13 jasar jetkinshek tabyldy
RIDDER. QazAqparat – Shyǵys Qazaqstan oblysy Rıdder qalasynyń polıtseıleri joǵalyp ketken 13 jastaǵy jasóspirimdi tapty, dep habarlaıdy QazAqparat tilshisi.
ShQO polıtsııa departamenti baspasóz qyzmetiniń málimetine súıensek, 24 qańtar saǵat 22.15 kezinde Rıdder polıtsııa bólimine 38 jastaǵy qala turǵyny habarlasqan.
Ol osydan bir kún buryn saǵat 13.00 shamasynda 13 jasar balasynyń dalaǵa shyǵyp ketip, sol kúıi oralmaǵanyn aıtty.
Áke-sheshesi men týystary óz betimen qansha izdese de taba almaǵan.
«Tártip saqshylary birden jasóspirimdi izdeýge kiristi. Onyń uıaly telefony sónip turǵan. Kóshelerdi aralap, turǵyndardan surastyryp, qudyqtardy da tekserdi. Osylaısha 25 qańtar saǵat 8.00-de jasóspirim Rıdder qalasyndaǵy Rechnoı kóshesinde ornalasqan jer úılerdiń birinen tabyldy. Qazir ol áke-sheshesimen birge» dep habarlady vedomstvo ókilderi.
Polıtseıler onyń ne sebepti úıden ketip qalǵanyn anyqtap jatyr.
Kámeletke tolmaǵandar isi jónindegi ınspektorlar 13 jastaǵy jasóspirimmen jumys júrgizýde.
