Shyǵys Qazaqstanda jazda qaıda demalýǵa bolady

Alakól

Bıyl Alakólde demalýshylar sany jyldaǵydan arta túspek. Sebebi bul demalys orny jańartylyp, túrli qyzmet túrleri paıda boldy. Odan bólek te kóptegen jaǵymdy jańalyqtarmen qýanta alady.

Mundaǵy tabıǵat tuşy kólimen, taza aýasymen, tamasha jaǵajaılarymen jáne sýynyń emdik qasıetimen tanymal. Alakóldegi demalys bazalarynda balalardyń oıyn alańdary, balalar basseıni, sporttyq oıyndar, bı keshteri, ekskýrsııa, balyq aýlaý, monsha, saýna, sý attraktsıondary, kýrorttyq-sanatorıılik em-sharalar sekildi demalys túrlerin usynady. Demalys maýsymy Alakólde 21 mamyrdan bastalyp, qyrkúıektiń sońyna deıin jalǵasady.

Óskemen qalasymen ara qashyqtyǵy: 610 shaqyrym. Semeımen ara qashyqtyǵy: 660 shaqyrym. Birkúndik demalý baǵasy ortasha eseppen alǵanda bir adamǵa 6000-7000 teńgeden aınalady, bul somanyń ishine úsh ýaqyt ystyq tamaǵy kiredi. Baǵalar demalys maýsymynyń ár kezeńine qaraı ózgerip otyrady (maýsym aıynda baǵalar aıtarlyqtaı tómen).

Jetý joldary: poıyz, ushaq, avtobýs, taksı jáne jeke avtokólik.

15 maýsymnan bastap Alakólge «Óskemen-Jalańashkól», «Semeı-Jalańashkól» baǵyttary boıynsha poıyz júre bastaıdy. Bılet baǵasy: platskart - 2800 teńge, kýpe - 4000 teńge.

Aptasyna eki ret «Óskemen-Úrjar», «Semeı-Úrjar» baǵytynda ushaq reısteri bar. Bılet baǵasy: 10 000 teńge.

Kúnde «Óskemen-Alakól», «Semeı-Alakól» baǵytynda avtobýstar júredi. Bılet baǵasy: 2600-3000 teńge.

Alakólge deıin taksıdiń jol aqysy shamamen 40-50 myń teńge bolady. Sondaı-aq, Óskemen-Almaty tas jolymen jeke avtokólikpen de shyǵýǵa bolady.

Taıynty

Shyǵysqazaqstandyqtar arasynda asa tanymal demalys oryndarynyń biri. Bul jerde adamdar jartastar men qaraǵaıly taýlar, sý tup-tunyq kól, qaıyńdy, butaly shoq ormannyń ortasynda demalady. Usynylatyn demalys túrleri: dámhanalar, serýen, sýǵa shomylý, jaǵajaı demalysy, sańyraýqulaq terý, sport alańdary. Demalys orny 2 maýsymda ashylady.

Óskemenmen ara qashyqtyǵy:  90 shaqyrym. Birkúndik demalý baǵasy: táýligine 4000 teńgeden bastalady. Jetý joldary: taksı jáne jeke avtokólik. Taksıdiń jol aqysy: Óskemennen 9000 teńgege jýyq. Jeke avtokólikpen Óskemen-Samara tasjoly arqyly shyǵýǵa bolady.

Sibe kólderi

Jaz mezgilinde suranysqa ıe taǵy bir demalys orny. Munda demalýshylardy tamasha tabıǵat ózine baýraıdy: aınadaı jarqyraǵan kólderi, granıtten turatyn taý silemderi, shalǵyn shóbi men butalary. Usynylatyn demalys túrleri: balalarǵa arnalǵan oıyn alańdary, pırs, sport alańdary. Demalys orny 4 maýsymda ashylady.

Óskemennen 78 shaqyrym jerde ornalasqan. Birtáýliktik demalý baǵasy:  táýligine 7000-22000 teńge aralyǵynda. Jetý joldary: taksı, jeke avtokólik. Taksıdiń jol aqysy:  Óskemennen shamamen 7000-8000 teńge. Jeke avtokólik: Óskemen-Alǵabas tasjoly.

Ótken jyly demalys ornyna arnaıy avtobýs qatynady. Reıstiń qaıta jandanýy ázirge belgisiz.

Dubyǵaly kóli (Okýnkı)

Tabıǵaty ásem jerlerdiń biri: qumdy jaǵajaı, jartastar, kól, úńgirli tas-taýlar. Usynylatyn demalys túrleri: sýǵa shomylý, dámhanalar, serýen, jaǵajaıda demalý.

Óskemennen ara qashyqtyǵy: 80 shaqyrym. Baǵasy: táýligine 7000 teńgeden bastalady. Jetý joldary: taksı (Óskemennen 7000-7500 teńge) jáne jeke avtokólik (Óskemen-Semeı tas joly).

Buqtyrma

Shyǵys Qazaqstanda ǵana emes, sheteldikterge de tanys demalys orny. Bazalary 1 maýsymda ashylady.

Óskemennnen ara qashyqtyǵy:  76 shaqyrym. Baǵasy:  ortasha eseppen bir adamǵa 5000 teńgeden bastalady. Jetý joldary: taksı, avtobýs, poıyz, jeke avtokólik.

Aptasyna úsh ret «Zaşıta-Zyrıan» baǵytynda «Jańa Buqtyrma» stantsııasyna deıin poıyz júredi. Jańa Buqtyrmadan taksı nemese parom arqyly demalys bazalaryna jetýge bolady. Ázirshe poıyzdyń reıske shyǵý ýaqyty men bılet baǵasy belgisiz.

Sondaı-aq, «Óskemen-Kógildir buǵaz-Jańa Buqtyrma-Aına» baǵytynda kúndelikti avtobýs shyǵady. Bılet baǵasy: 1000 teńge (naqty baǵasy 1 maýsymnan keıin belgili bolady).

Jańa Buqtyrmaǵa deıin taksıdiń baǵasy 7000-8000 teńge, ary qaraı demalys bazasyna deıin ár shaqyrymǵa 70-100 teńgeden aınalady.