Shyǵys Qazaqstanda jańa eki aýdan qurylady
QR Prezıdenti Qasym-Jomart Toqaev maýsym aıyndaǵy Ulttyq quryltaı otyrysynda Shyǵys Qazaqstandaǵy birqatar aýdandy qaıta qalpyna keltirý qajettigi jaıly aıtqan bolatyn.
Soǵan oraı oblysta keıbir aýdandardy bólý jáne olardy 1997 jylǵy aýmaqtyq shekaralarǵa qaıtarý jónindegi jospar bekitilgen.
Búgin oblystyq máslıhat depýtattary ShQO quramynda ákimshilik ortalyǵy Úlken Naryn aýyly bolatyn Úlken Naryn aýdanyn qurýǵa jáne jańa aýdandy Katonqaraǵaı aýdanynyń quramynan bólýge, sondaı-aq ákimshilik ortalyǵy Marqakól aýyly bolatyn Marqakól aýdanyn qurý jáne bul aýdandy Kúrshim aýdanynyń quramynan bólýge daýys berdi. Osylaısha, Katonqaraǵaı aýdanynyń ákimshilik ortalyǵy Úlken Naryn aýylynan Katonqaraǵaı aýylyna kóshiriledi.
«Jańa aýdandardy qurýdyń arqasynda biz memlekettik basqarýdy ońtaılandyrýǵa qol jetkize alamyz. Aýdan ortalyǵyna deıingi qashyqtyqtyń qysqarýyna baılanysty qyzmetterge yńǵaıly qoljetimdilikti qamtamasyz etemiz. Jergilikti máselelerdi sheshýde aýdandardyń derbestigin arttyramyz, nátıjesinde halyqtyń ómir súrý sapasy jaqsarady. Jańa jumys oryndaryn ashyp, halyqtyń kóshi-qon protsesteriniń tómendeýine qol jetkizemiz, - dep túsindirdi Kúrshim jáne Katonqaraǵaı aýdandarynyń ákimdikterinen.
Depýtattardyń daýys berýinen keıin ShQO ákimi Ermek Kósherbaev jańadan qurylyp jatqan aýdandardy damytý jóninde birqatar tapsyrma berdi.
«Jańadan qurylǵan aýdandardy shtattarmen qamtamasyz etý jóninde sharalar qabyldaý qajet. Suraq óte mańyzdy. Óıtkeni biz qosymsha shtattardy suraǵan joqpyz, biraq aýdandardaǵy shtat tolyq bolýy kerek. Halyqtyń azdyǵyna qaramastan, aýdandar shekarada ornalasqan. Al bizde Prezıdenttiń shekara mańyndaǵy aýdandardy damytý jónindegi tapsyrmasy bar. Sondyqtan olardy tıisti múmkindiktermen qamtamasyz etý qajet», - dedi aımaq basshysy.
Sonymen qatar ShQO ákiminiń orynbasarlary jańa aýdandarda memlekettik organdardy ornalastyrý úshin ǵımarattardy jóndeý máselesin pysyqtap, basqa óńirlerden tartylatyn mamandardy turǵyn úımen qamtamasyz etýi tıis. Budan bólek, jańadan qurylǵan aýdandarda medıtsınalyq uıymdar aýdandyq deńgeıge aýystyrylady, olar barlyq qajetti jabdyqtarmen jáne kadrlarmen qamtamasyz etiledi.