Shyǵys Qazaqstanda zańsyz aınalymnan 28 qarý tárkilendi
ÓSKEMEN. QazAqparat – Shyǵys Qazaqstan oblysynda zańsyz aınalymdaǵy 28 qarý tárkilendi, dep habarlaıdy QazAqparat tilshisi.
ShQO polıtsııa departamenti baspasóz qyzmetiniń málimetine súıensek, tártip saqshylary óńir aýmaǵynda quqyq buzýshylyqtardyń aldyn alý maqsatynda qyrkúıek aıynan bastap «Ýchaske» jedel aldyn alý sharasyn júrgizip jatyr.
Eki aıdyń ishinde polıtseıler kópqabatty úılerdiń 247 000-ǵa jýyq páterin, 190 000-nan astam jeke turǵyn úıdi jáne 40 079 saıajaıdy aralap shyqty.
4 000-nan astam jaldamaly páter tekserildi. Salyq organdaryna tirkeýsiz úıdi jalǵa berýdiń 477 faktisi anyqtaldy.
«Shara barysynda 28 800 adam ákimshilik jaýapkershilikke tartyldy. Onyń ishinde bala tárbıeleý jónindegi mindetterin oryndamaǵany úshin – 100 ata-ana, usaq buzaqylyq úshin – 1 408, qoǵamdyq oryndardy lastaǵan – 2 305 adam aıyppul arqalaǵan», - delingen aqparatta.
Azamattyq atys qarýynyń ıelerin tekserýge de erekshe nazar aýdarylǵan.
Jalpy 11 700 azamattyq qarý ıesi tekserýden ótti.
Nátıjesinde, zańsyz aınalymdaǵy 28 atys qarýy tárkilendi.
