Shyǵys Qazaqstanda vaktsına alǵandar sany 3 esege ósti
ÓSKEMEN. QazAqparat – Shyǵys Qazaqstan oblysynda qazan aıyna deıin 747 myń adam koronavırýsqa qarsy vaktsına alady dep josparlanyp otyr, dep habarlaıdy QazAqparat tilshisi.
Búgin oblys ákimdiginde ótken aımaqtyq úılestirý keńesiniń otyrysynda sońǵy alty aı ishinde óńirde vırýs juqtyrǵandar sany 15 esege tómendegeni aıtyldy.
«Eger ótken jyldyń qarasha aıynda qaýipti dertke shaldyqqandar sany 9,7 myńnan astam assa, naýryzda bul kórsetkish 645-ke azaıǵan. Dese de epıdemıologııalyq jaǵdaı sáýir aıynda ýshyǵa bastady. Ol kezde vırýs juqtyrǵandar sany 2,8 esege ósken», - dedi oblys ákiminiń orynbasary Shakárim Buqtuǵutov.
Onyń aıtýynsha, aımaqtaǵy epıdemıologııalyq jaǵdaıdy turaqtandyrýdyń eń ońtaıly joly - vaktsınatsııalaý. Qazir oblysta 380 mamandandyrylǵan vaktsına pýnkti jumys istep tur. Sáýirdiń basynda COVID-19-ǵa qarsy ekpe alǵan adamdyń sany 14,5 myńǵa jetken. Búginde bul kórsetkish 3 esege ósip otyr.
Sáýir aıynyń sońyna deıin vaktsınanyń qosymsha 72 myń dozasy jetkiziledi. Qazan aıynyń basyna deıin óńirde 747 myń adam nemese jalpy halyqtyń 53 paıyzy ekpe alady dep josparlanǵan.
«Bul úshin barlyq múmkindikter bar. Tek bir táýlikte 380 pýnktte 13 300 adam, al bir aıda 292 600 adam vaktsına ala alady. Búginde vaktsınanyń jańa dozalarynyń jetkizilýin kútip otyrmyz. Birinshi kezekte Óskemen, Semeı, Aıagóz qalalary jáne ónerkásiptik kásiporyndardyń egpk pýnktteri qamtylady», - dedi aımaq basshysy Danıal Ahmetov.
