Shyǵys Qazaqstanda úzdik qutqarýshylar marapattaldy
ShQO Tótenshe jaǵdaılar departamenti baspasóz qyzmetiniń málimetine súıensek, búgin departament ǵımaratynda Táýelsizdik kúnine oraı saltanatty jıyn ótti. TJD bastyǵy Erlan Nurpeıisov quttyqtaý sóz sóılep, qutqarýshylarǵa atqaryp jatqan jumystary úshin alǵys bildirdi.
«TJD qyzmetkerleri jyl saıyn 5000-ǵa jýyq kómekke attanyp, 1000-nan astam apattyq-qutqarý jumystaryn júrgizedi. Sonyń nátıjesinde myńdaǵan adamnyń ómirin qutqarady», - dedi ol.
Shara barysynda 14 qutqarýshy «Qazaqstan táýelsizdigine 30 jyl» medalimen marapattaldy. Olar órt sóndirýshiniń qyzmettik boryshyn abyroımen oryndaǵany, janqııarlyǵy, erligi men batyrlyǵy úshin osyndaı marapatqa ıe bolyp otyr. Sonymen qatar qyzmetine adaldyq tanytqan TJD bólimsheleriniń 12 qyzmetkerine vedomstvolyq nagradalar jáne Alǵys hattar berildi.
