Shyǵys Qazaqstanda úsh balyqshy sýǵa qulap, bireýi qaza tapty
ÓSKEMEN. QazAqparat - Shyǵys Qazaqstan oblysynda úsh balyqshy muz astyna batyp, bireýi qaza tapty. Oqıǵa 2018 jyldyń 30 jeltoqsanynda, Kúrshim aýdanyndaǵy Buqtyrma sý qoımasynda oryn alǵan. Bul týraly ShQO TJD-ne silteme jasap, «QazAqparat» HAA habarlaıdy.
Úsh adam Kókpekti jaǵalaýynan Kúrshimge kólikpen ótpek bolǵan. Jaǵalaýdan 15 metrdeı jerde avtomobıl muz astyna qulady. Eki balyqshy, 1965 jáne 1973 jylǵy azamattar sýǵa batyp bara jatqan kólikten shyǵyp úlgergen, al 1959 jylǵy er adam kólikte qalyp qoıdy. Zardap shekken azamattarǵa jergilikti balyqshylar kómek kórsetip, qutqarý qyzmetine habar bergen.
Sol kúni oqıǵa ornyna kelip jetken Shyǵys aımaqtyq aeromobıldi jedel-qutqarý jasaǵy 9-shy bólimshesiniń súńgýirleri er adamnyń denesin alyp shyǵa almady, sebebi kólik aýdarylyp, esigi ashylmaı qalǵan. Kelesi kúni súńgýirler arqan men júkarbanyń kómegimen kólikti sýdan shyǵaryp, ishinen er adamnyń denesin shyǵaryp aldy.
«Qatty aıazǵa qaramastan, sýdaǵy jaǵdaı aýyspaly bolyp turady. Ondaǵy muzdyń qalyńdyǵyna tek aýa temperatýrasy ǵana emes, aǵynnyń aýysýy, jaýyn-shashyn, ózge de faktorlar áser ete alady. Budan basqa, bir ýchaskede muzdyń qalyńdyǵy ár túrli bolýy múmkin», - dep atap ótti ShAAJQJ bas qutqarýshysy Anatolıı Rojkov.
Qutqarýshylar muzǵa shyqqan kezde qaýipsizdik erejelerin saqtaý qajet ekenin eske saldy: muzdan jaıaý ótý úshin onyń qalyńdyǵy 15 sm jáne odan kóp, al jeńil kólik ótýi úshin 30 sm kem bolmaýy tıis.
Muz betine qarańǵy ýaqytta, tuman, jaýyn-shashyn túskende shyǵýǵa tyıym salynǵan.
Muz qalyńdyǵyn aıaqty soǵyp tekserýge bolmaıdy. Eger taıaqpen soqqanda muz betine az bolsa da sý shyǵyp nemese jaryq paıda bolsa, bul muzdyń áli juqa ekenin bildiredi. Osyndaı jaǵdaıda aıaǵyńdy muzdan almaı, kelgen izińmen jaǵaǵa oralý kerek.
