Shyǵys Qazaqstanda tumaýmen aýyrǵan balalar sany artty
ÓSKEMEN. QazAqparat – Shyǵys Qazaqstan oblysynda qazan aıynan bastap jiti respıratorlyq vırýs ınfektsııasyn juqtyrǵandar sany artyp otyr, dep habarlaıdy QazAqparat tilshisi.
Bul jaıly ShQO densaýlyq saqtaý basqarmasynyń Semeı qalasy boıynsha bas pedıatry Mádenıet Daırabaeva málim etti.
«Ótken aıdan bastap óńirde JRVI-men aýyrǵandar sany ósti. Aýrýdyń jartysanan kóbi 14 jasqa deıingi balalar arasynda tirkelgen. Oblys boıynsha naýqastarǵa arnalǵan 586 tósek-oryn bar. Onyń 352-i – pedıatrııalyq, 234-i – ınfektsııalyq. Qarasha aıynyń basynda Semeıde tynys alý júıesindegi aýrýǵa shaldyqqan balalarǵa tósek qorynyń jetispeýshiligi sezildi. Aýrýhanalarǵa ásirese 1 jasqa deıingi balalar kóp túsip jatyr», - dedi ol.
Epıdemıologııalyq jaǵdaıǵa oraı ShQO densaýlyq saqtaý basqarmasy basshysynyń buıryǵymen qosymsha 50 tósek-oryn ashylǵan.
Onda balalar jas shamasyna baılanysty bólinip jatqyzylýda.
«Semeı qalasyndaǵy «Venera» medıtsınalyq mekemesinde JRVI jáne pnevmonııa asqynǵan 2 jasqa deıingi balalardy jatqyzý úshin 30 tósek-oryn daıyndaldy. Sonymen qatar Semeıdegi №2 qalalyq aýrýhanada 2 jastan 18 jasqa deıingi 20 bala ornalasady», - dedi Mádenıet Daırabaeva.
