Shyǵys Qazaqstanda tumaýǵa baılanysty eki mektep karantınge jabyldy
ASTANA. QazAqparat - Óńirde respıratorly ınfektsııalardy juqtyrý sany kúrt artyp keledi.
Osy sebepti, sanıtarlyq dárigerler Shemonaıhanyń eki mektebinde karantın jarııalaý sheshimin qabyldady, dep habarlady YK-news.kz.
ShQO tutynýshylar quqyqtaryn qorǵaý departamentiniń habarlaýynsha, qańtar aıynyń úshinshi aptasynda dárigerler 5629 naýqasqa JRVI (juqpaly respıratorly vırýsty ınfektsııa) dıagnozyn qoıdy. Onyń aldyńǵy aptada syrqattanǵandar sany budan da kóp bolǵan. Ótken jyly jeltoqsannyń sońǵy onkúndiginde 4415 adam aýyrdy.
JRVI juqtyrǵandar sany ásirese, Shemonaıhada kóp. Ondaǵy eki mektepti ýaqytsha jabýǵa týra kelgen.
«Oblys boıynsha eki mektepke ǵana karantın engizildi», - dep habarlady ShQO bilim berý basqarmasynyń baspasóz hatshysy Medet Álimǵazın. - Mektep oqýshylarynyń otyz paıyzdan astamy naýqastanǵan jaǵdaıda, mundaı sharalar mindetti. Shemonaıhadaǵy eki mektep qańtar aıynyń sońyna deıin ýaqytsha jabylady».
ShQO tutynýshylar quqyqtaryn qorǵaý departamenti óńirdegi ózge mektepterde karantın jarııalaý josparlanbaǵanyn habarlady.
