Shyǵys Qazaqstanda tumaý juqtyrǵandar sany 30 paıyzǵa artty
ÓSKEMEN. QazAqparat – Shyǵys Qazaqstan oblysynda bıyl jiti respıratorlyq vırýs ınfektsııasymen aýyrǵandar sany 30 paıyzǵa artty, dep habarlaıdy QazAqparat tilshisi.
ShQO sanıtarlyq-epıdemıologııalyq baqylaý departamenti baspasóz qyzmetiniń málimetine súıensek, jyl basynan beri óńirde 94 473 adam jiti respıratorlyq vırýstyq ınfektsııany juqtyryp alǵan.
Onyń ishinde 43 myńǵa jýyǵy - 14 jasqa deıingi balalar.
«Aımaq boıynsha ınfektsııaǵa shaldyqqandardyń kóbi – Óskemende (46 myńnan astam adam). Al eń azy – Tarbaǵataı aýdanynda (31 adam). Ótken jyldyń sáıkes kezeńimen salystyrǵanda aýrýshańdyq deńgeıi 31,6 paıyzǵa artyp otyr. Buǵan COVID-19 indetine baılanysty halyqtyń medıtsınalyq kómekke júginýiniń artýy sebep boldy», - dedi departament basshysy Qanat Turdıev.
Onyń aıtýynsha, bıyl oblysta 24 555 adam tumaýǵa qarsy ekpe alǵan.
