Shyǵys Qazaqstanda tumanǵa baılanysty jabylǵan jol qaıta ashyldy

ÓSKEMEN. QazAqparat – Shyǵys Qazaqstan oblysynda tumanǵa baılanysty jabylǵan jol qaıta ashyldy, dep habarlaıdy QazAqparat tilshisi.

ShQO tótenshe jaǵdaılar departamenti baspasóz qyzmetiniń málimetine súıensek, búgin saǵat 13.30-dan bastap jabylǵan jol qaıta ashyldy.

«Tuman túsip, joldyń durys kórinbeýine baılanysty jabylǵan oblystyq mańyzy bar «Óskemen-Tarǵyn-Samar» tasjolynyń 88-145 shaqyrymynda (Joǵarǵy Taıynty men Samar aýyldarynyń aralyǵy) kóliktiń barlyq túri úshin qozǵalysqa ruqsat berildi. Osy rette, óńir jurtshylyǵyna alys saparǵa shyǵar aldynda joldardyń jaı-kúıin «Dármen» mobıldi qosymshasy arqyly tekserip otyrýǵa keńes beremiz», - delingen aqparatta.

Eske salsaq, osyǵan deıin Shyǵys Qazaqstandaǵy tasjoldardyń birinde kólik qozǵalysyna tyıym salynǵanyn habarlaǵan edik.