Shyǵys Qazaqstanda toı jasaýǵa jáne as berýge tyıym salyndy
Soǵan oraı oblys kóleminde kontsertter, konferentsııalar, semınarlar, kórmeler men dóńgelek ústelder syndy taǵy da basqa sharalar ýaqytsha uıymdastyrylmaıdy. Al josparlanǵan buqaralyq sharalar keıinge qaldyryldy. Bul týraly ShQO Aqparattyq ortalyǵynda ótken brıfıngte oblystyq Mádenıet, muraǵattar jáne qujattama basqarmasy basshysynyń mindetin atqarýshy Raýshan Nurmahanova málim etti.
«Epıdemıologııalyq jaǵdaı jaqsarǵanǵa deıin mýzeıler men kitaphanalarǵa, sondaı-aq tarıhı-mádenı oryndarǵa kirýge ýaqytsha tyıym salyndy. Budan bólek, sporttyq úıirmeler men til úırený kýrstarynyń jumysy toqtatyldy. Kontserttik uıymdar men teatr qyzmetkerleri ýaqytsha gastroldik saparlarǵa shyǵa almaıdy. Al daıyndyq jumystary júrgizile beredi», - dedi ol.
Basqarma basshysynyń aıtýynsha, eger osy salada eńbek etip júrgen áıelderdiń kámelettik jasqa tolmaǵan balalary bar bolsa, olar qashyqtan jumys isteı alady.
«Oblystyq Mádenıet, muraǵattar jáne qujattama basqarmasynyń qyzmetkerleri ýaqytsha úsh topqa bólindi. Olardyń eńbekaqysy saqtalady. Birinshi toptyń quramynda ákimshilik-basqarýshylyq salada eńbek etip júrgen qyzmetkerler bar. Ekinshi toptaǵylar qashyqtyqtan jumys isteıdi. Úshinshi topta ekologııalyq demalysqa shyqqandar», - dedi Raýshan Nurmuhanova.
Onyń sózine sensek, otbasylyq merekeler men toı jasaýǵa, sondaı-aq as berýge ýaqytsha tyıym salyndy.