Shyǵys Qazaqstanda taýǵa shyqqan 35 adam koronavırýs juqtyrdy
ÓSKEMEN. QazAqparat – Shyǵys Qazaqstan oblysynda qaýipti dertke shaldyqqandar sany ósip jatyr, dep habarlaıdy QazAqparat tilshisi.
ShQO Aqparat ortalyǵynyń málimetine súıensek, óńir turǵyndarynyń qoǵamdyq oryndarda maska kımeı, áleýmettik qashyqtyqty saqtamaı, respıratorlyq aýrýdyń belgileri paıda bolǵan kezde birden medıtsına qyzmetkerine habarlaspaıtyndyqtan COVID-19 ınfektsııasyn juqtyrǵandar sany kún saıyn artyp keledi. Sońǵy aptada bul kórsetkishtiń ósý qarqyny 8% qurady. Ásirese Semeı jáne Óskemen qalalarynda naýqastar kóp. Óskemende dertke shaldyqqandardyń ósý qarqyny aımaqtyq kórsetkishten joǵary, ıaǵnı 9,9% qurap otyr. Al Semeıde – 6,3%.
«Bekitilgen talaptarǵa nemquraılyq tanytyp, saqtyq sharalaryn saqtamaıtyndar az emes. Tipti otbasylyq sharalardy ótkizip jatqandar da bar. Mysaly, Semeıde taýǵa shyqqan 35 adam vırýs juqtyrǵan. Taǵy bir jaǵdaıda týǵan kúndi atap ótken eki otbasynyń 9 múshesinen SOVID-19 anyqtaldy. Budan bólek, bir otbasynan 11 adam men olardyń 2 kórshisi jáne jumystaǵy 3 áriptesi dertke shaldyqqan. Aýyrǵandardyń biri – Nur-Sultan qalasynan qonaqqa kelgen» delingen habarlamada.
Aıta keteıik, Shyǵys Qazaqstanda maýsym aıynda naýqastar sany aldyńǵy aımen salystyrǵanda 4,2 esege ósti. 29 maýsymdaǵy jaǵdaı boıynsha 742 adam vırýs juqtyrǵan.
Esterińizge sala ketsek, osyǵan deıin Óskemen qalasynda 11 shildege deıin karantın sharalarynyń kúsheıtilgenin habarlaǵan bolatynbyz.
