Shyǵys Qazaqstanda taýdaǵy órtti sóndirýge eki kún ýaqyt ketti
ÓSKEMEN. QazAqparat – Shyǵys Qazaqstan oblysy Ulan aýdanyndaǵy taýly jerlerde shyqqan qyzyl jalynmen órt sóndirýshiler eki kún boıy arpalysty, dep habarlaıdy QazAqparat tilshisi.
ShQO tótenshe jaǵdaılar departamenti baspasóz qyzmetiniń málimetinshe, 7 maýsymda Prımorsk orman sharýashylyǵynda órt shyqqan. Tilsiz jaý qaraǵaı, qaıyń jáne terekterdi sharpydy. Aldyn ala málimet boıynsha, órttiń jalpy aýmaǵy – 5,5 gektardy quraǵan. Ot búgin saǵat 9.15-te sóndirildi.
«Eki kún ishinde órttiń aýmaǵyna tikushaqpen barlaý júrgizildi. Qazirgi ýaqytta kúıgen aǵashtarǵa sý tógilýde. Bul taýly jer bolǵandyqtan tilsiz jaýdy aýyzdyqtaý qıynǵa soqqan. Ár tastyń astyn qarap, janyp jatqan shópti sóndirýge týra keldi. Keıbir órt oshaqtary topyraqpen kómildi», - dep habarlady vedomstvo ókilderi.
Aıta keteıik, qyzyl jalynmen kúreske órt sóndirý bóliminiń 7 qyzmetkeri men jergilikti atqarýshy organnan 10 adam jumyldyrylǵan.
