Shyǵys Qazaqstanda taǵy da qar kóshkini júrdi
ÓSKEMEN. QazAqparat – Shyǵys Qazaqstan oblysynda kúnniń kúrt jylynýynan taǵy da qar kóshkini júrdi, dep habarlaıdy QazAqparat tilshisi.
ShQO tótenshe jaǵdaılar departamenti baspasóz qyzmetiniń málimetine súıensek, 4 sáýirde saǵat 13.31-de Katonqaraǵaı aýdanyndaǵy jergilikti mańyzy bar «Sogornoe-Barlyq» tasjolynda kóshkin júrdi.
«Atalǵan tasjoldyń 16-shaqyrymynda jalpy kólemi 2300 tekshe metr qar túsken. Qar joldy tolyqtaı jaýyp tastady. Zardap shekken eshkim joq», - dep habarlady vedomstvo ókilderi.
Qazirgi ýaqytta jergilikti atqarýshy organ qyzmetkerleri joldy tazalaý jumystaryn júrgizip jatyr.
Esterińizge sala ketsek, osyǵan deıin «Óskemen-Rahman qaınary» tasjolynyń 435 jáne 437 shaqyrymdarynda kóshkin júrgeni habarlanǵan bolatyn.
