Shyǵys Qazaqstanda tabıǵat qorǵaý salasynda 4 qylmystyq is qozǵaldy
ASTANA. Aqpannyń 10-y. QazAqparat /Aıdar Ospanalıev/ - Shyǵys Qazaqstan oblystyq tabıǵatty qorǵaý salasynyń polıtseıleri ańshylyq jasaýǵa tyıym salynǵan ýaqytta sibir elikterin atyp júrgen jergilikti turǵyndardyń birin ustady.
Atalmysh áreketten memleketke kelgen shyǵyn 140 myń teńgeni qurady. Bul týraly búgin Іshki ister mınıstrliginiń Til saıasaty jáne aqparat departamentiniń bastyǵy Qýanyshbek Jumanov málim etti, dep habarlaıdy QazAqparat.
Onyń derekteri boıynsha, atalmysh aımaqta jyl basynan beri zańsyz ań men balyq aýlaý, zańsyz aǵash kesý áreketteri boıynsha 4 qylmystyq is qozǵalǵan. Al respýblıka boıynsha 2009 jyl boıyna zańsyz ań aýlaýdyń 2 myń faktisi oryn alyp, 105 qylmystyq is qozǵalǵan. «Ań aýlaý tártibin buzǵany úshin 2 myń 205 azamat ákimshilik jaýapqa tartyldy. Brakonerlerden ańshylyqpen aınalysýǵa arnalǵan 897 qural tárkilendi. Olardyń 1 myń 67-si - atys qarýy», dedi departament bastyǵy.
