Shyǵys Qazaqstanda sýǵa ketkenderdiń bári ruqsat etilmegen jaǵajaıda shomylǵan

ÓSKEMEN. QazAqparat – Shyǵys Qazaqstan oblysynda jaz bastalǵaly beri sýǵa batqandardyń barlyǵy ruqsat etilmegen jaǵajaıda shomylyp júrgen, dep habarlaıdy QazAqparat tilshisi.

ShQO tótenshe jaǵdaılar departamenti baspasóz qyzmetiniń málimetine súıensek, óńir qutqarýshylary azamattardyń sýǵa batý faktilerine taldaý júrgizdi.

Maýsym aıynan beri aımaqta 6 adam sýǵa batyp ketken. Onyń 5-eýi kúshin asyra baǵalaý saldarynan mert boldy.

Búkil jazataıym oqıǵa shomylýǵa ruqsat etilmegen jaǵajaılarda tirkelgen.

«Jaqsy júze alatyn adamnyń ózi kenetten ınfarkt, ınsýlt alyp, esten tanyp qalýy múmkin. Osyndaı jaǵdaılar óte kóp. Sondyqtan táýekelge barýdyń esh qajeti joq. Jaz boıy halyqqa túbi zerttelmegen sý aıdyndarynda shomylýǵa bolmaıtynyn eskertip kelemiz. Sý aıdyndaryndaǵy qaıǵyly oqıǵalardyń aldyn alý maqsatynda 2900-den astam reıd júrgizip, 15000-nan astam adamǵa nusqama berdik», - deıdi oblystyq TJD bastyǵynyń orynbasary Arman Toqanov.

Onyń aıtýynsha, otbasymen demalǵan kezde balalarǵa erekshe nazar aýdarý kerek. Olardy bir mınýtqa da kózden tasa qylýǵa bolmaıdy.

Qutqarýshylar polıtsııa qyzmetkerlerimen birlesip patrýldeý júrgizý kezinde ózen-kól jaǵalaýynda túrli zańbuzýshylyqtarǵa jol bergen 37 adamǵa eskertý jasap, 73 adamǵa aıyppul saldy.