Shyǵys Qazaqstanda sýǵa kete jazdaǵan alty adam qutqaryldy
ASTANA. QazAqparat - Shyǵys Qazaqstan oblysynda Ertis ózenine jaqyn Kýrchatov qalasynyń tusynda bir áıel sýǵa ketti, dep habarlaıdy QazAqparat tilshisi Shyǵys Qazaqstan oblysyyń Tótenshe jaǵdaılar departamentiniń baspasóz qyzmetine silteme jasap.
Vedomstvonyń habarlaýynsha, 7 adam Besqaraǵaı aýdany Grachı aýylyna Ertis ózeninde qaıyqpen qaıtyp kele jatqan.
«Áıelder azyq-túlik alyp, 16 jáne 13 jastaǵy balalarymen úıine qaıtyp kele jatqan. Olardy metall qaıyqta er adam tasymaldaǵan. Alaıda jol ortasynda qıyndyqtar týyndaǵan bolýy kerek. Qaıyq ústindegi adamdar sýǵa túsip ketip, bata bastaǵan. Qazirgi ýaqytta osy jaǵdaıdyń sebepteri anyqtalyp jatyr», - delingen habarlamada.
Sýǵa batyp bara jatqandardy jergilikti turǵyndar kórip qalypty. Olar birden «102» nómirine habar bergen kórinedi. Óz kezeginde tártip saqshylary birden qutqarýshylarǵa habarlasqan.
«Bul jaǵdaı jaǵadan 15-20 metr qashyqtyqta bolǵan. Batyp bara jatqan adamdardyń jan ushyrǵan daýysyn Grachı aýylynyń turǵyndary estip qalypty. Olar qaıyqqa otyra qap, kómekke umtylǵan. Nurlyjan Qojahmetov birshama qashyqtyqty júzip ótip, adamdardy jaǵaǵa jetkizgen. Ózennen úsh áıeldi jergilikti turǵyndar alyp shyqty. 1980 jyly týǵan taǵy bir áıeldi qutqarý múmkin bolmady», - deıdi Kýrchatov TJB bastyǵynyń mindetin atqarýshy Oljas Saptanbaev.
Arada ýaqyt ótkennen keıin órt sóndirý qyzmetkerleri oqıǵa ornyna jetip, bir shaqyrym jerden sýǵa ketken 38 jastaǵy áıeldiń denesin taýyp aldy.
Qatty tońyp qalǵan zardap shegýshiler Kýrchatov qalasynyń aýrýhanasyna jetkizilgen. Olardyń bári de bir-birine týys bolyp shyqty. Eki bala, úsh áıel men bir er adam dárigerlerdiń baqylaýyna alynǵan.
Foto: kaluganews.com
