Shyǵys Qazaqstanda sottalǵan 2000-ǵa jýyq adam jumyspen qamtylǵan
ShQO Prokýratýrasynda ótken jınalys barysynda sottalǵandardy jumyspen qamtý máselesi qaraldy. Sharaǵa QAJ jáne Tótenshe jaǵdaılar departamentteriniń basshylary, oblystyq Kásipkerler palatasynyń dırektory, ýákiletti memlekettik organdar men iri kásiporyndardyń ókilderi qatysty.
«Oblys aýmaǵynda 6 túzetý mekemesi ornalasqan. Onda 2700-den astam sottalǵan adam otyr. Sondyqtan bas bostandyǵynan aıyrylǵandardy eńbekpen qamtý máselesi biz úshin asa ózekti», - dedi oblys prokýrorynyń orynbasary Erlan Andabaev.
Túzetý mekemelerinde qurylys materıaldaryn, shlakobloktardy, gazobloktardy, qumbloktardy, plastık terezeler, esikter, korpýstyq jáne jumsaq jıhaz, aǵashtan jasalǵan buıymdar, metall konstrýktsııalar, tigin buıymdary jáne basqa da taýarlar shyǵarý boıynsha óndirister uıymdastyrylǵan. Kolonııada shyǵarylatyn ónimderdiń baǵasy naryqtaǵydan tómen.
«Qazirgi ýaqytta óńirdegi túrmeler janynda «Eńbek-Óskemen» RMK jáne 65 jeke kásipker jumys isteıdi. Olar 1 961 sottalǵandy jumyspen qamtyǵan. Bul rette, oblys kolonııalarynda jańa óndiristerdi ashý úshin jalpy aýdany 8 myń sharshy metrden astam bos óndiristik úı-jaılar bar», - dedi E. Andabaev.
Jınalys qorytyndysy boıynsha memlekettik organdarǵa bıznes ókilderin kolonııalarǵa tartýdy keńeıtý, sottalǵandardyń jumyspen qamtylýyn ulǵaıtý jáne olardyń ónimin ótkizýge járdem kórsetý maqsatynda jan-jaqty qoldaý kórsetý usynyldy.
