Shyǵys Qazaqstanda shomylý maýsymyna daıyndyq máselesi talqylandy
ÓSKEMEN. QazAqparat - Tótenshe jaǵdaılardyń aldyn alý jáne joıý jónindegi oblystyq komıssııa eki máseleni, atap aıtsaq orman alqaptaryndaǵy órt jáne shomylý maýsymyna daıyndyq máselesin talqylady, dep habarlaıdy «QazAqparat» HAA tilshisi.
Kún ysıtyn maýsymǵa TJ qyzmetiniń daıyndyǵy máselesi oblys ákiminiń orynbasary Serik Aqtanovtyń qatysýymen ótken jıynda talqylandy. Shyǵys Qazaqstan TJD basshysynyń orynbasary Amangeldi Shegetaevtyń sózine qaraǵanda, óńirde jergilikti ákimdikterdiń esebinen qarjylandyrylatyn 59 órt kenti bar, alaıda onyń 12-si jumys jasamaıdy eken.
Sondaı-aq komıssııa erikti órt sóndirýshilerdi arnaıy ortalyqtarda daıyndaý máselesin de kóterdi.
Búgingi ýaqytta 10 orman jáne 1 dala órti tirkeldi. Alaıda óńirde ystyq aýa raıynyń birneshe kún qatarynan saqtalýy TJ qyzmetiniń jumysyn jeńildete qoımasy anyq. Órttiń shyǵý oshaqtary ǵaryshtyq monıtorıng derekteri arqyly turaqty baqylaýda bolady.
Sondaı-aq komıssııa jańa shomylý maýsymyna daıyndyq máselesin kún tártibine shyǵardy. Jıynda atalǵan másele boıynsha sóz alǵan ShQO TJQ bastyǵynyń orynbasary Aleksandr Lomygın demalys oryndary anyqtaý jáne kópshilik shomylatyn oryndardaǵy akvatorııa túbin tazalaý jumystarynyń júrgizilgendigin aıtty.
«Jabdyqtalmaǵan, ruqsat berilmegen aýmaqtarda shomylý negizgi jáne qaýipti problemalardyń biri. Óńirde arnaıy 339 demalys orny bar, onyń 3-eýi qalalyq, 311- jeke jaǵajaılar. Al qalǵan oryndar arnaıy daıyndyqtan ótkizilmegen jáne ruqsat etilmegen oryndar»,- dedi A. Lomygın.
