Shyǵys Qazaqstanda shomylý maýsymy bastalǵaly 24 adam sýǵa ketti
ÓSKEMEN. QazAqparat – Shyǵys Qazaqstan oblysynda shomylý maýsymy bastalǵaly beri 24 adam sýǵa batyp ketti, dep habarlaıdy QazAqparat tilshisi.
ShQO tótenshe jaǵdaılar departamenti baspasóz qyzmetiniń málimetine súıensek, demalýshylardyń nazaryn sýdaǵy qaýipsizdik máselelerine aýdarý úshin qutqarýshylar Úrjar aýdandyq jastar resýrstyq ortalyǵynyń eriktilerimen birlesip Alakól jaǵalaýynda arnaıy aktsııa ótkizgen.
«Oblystyń sý aıdyndarynda qaza bolǵandardy eske alý jáne demalýshylardyń nazaryn qaýipsizdik mádenıetine aýdarý maqsatynda aspanǵa 24 shar ushyryldy. «Qaýipsiz jaǵajaı» aktsııasy aıasynda qutqarýshylar men eriktiler jurtshylyqqa túsindirý jumysyn júrgizip, demalysyn qalaı qaýipsiz ótkizý týraly jadynamalar taratty», - delingen habarlamada.
Jyl saıyn Alakólde 12 myńǵa jýyq adam demalady. Barlyǵy 180-nen astam demalys orny bar.
«Qazirgi ýaqytta oblysta shomylý maýsymy bastalǵaly beri 24 adam sýǵa batyp ketti, onyń beseýi - bala. Qutqarýshylar osyndaı qaıǵyly jaǵdaılarǵa jol bermes úshin shomylýǵa tyıym salynǵan oryndardy patrýldep júr. Sondaı-aq adam kóp jınalatyn jerlerde áleýmettik rolıkter men sý aıdyndarynda qaýipsiz júris-turys erejelerin ornalastyryp, balalar lagerlerinde vıktorınalar uıymdastyrdy» delingen vedomstvo málimetinde.
