Shyǵys Qazaqstanda shekteý talabyn buzýdyń 14 faktisi tirkeldi

ÓSKEMEN. QazAqparat – Shyǵys Qazaqstan oblysynda karantın shekteýlerin saqtamaıtyndar áli de anyqtalýda, dep habarlaıdy QazAqparat tilshisi.

Óńirde arnaıy qurylǵan monıtorıngtik toptar karantın talaptarynyń saqtalýyn qadaǵalaý úshin qoǵamdyq kólikterde, dúkenderde, dárihanalar men basqa da mekemelerde kún saıyn reıd júrgizýde.

«9 maýsym kúni Óskemen qalasynda 166 nysan tekserildi. Oblystyń Bas sanıtarlyq dárigeri belgilegen shekteý sharalaryn buzýdyń 4 faktisi tirkeldi. Al Semeıde 245 obektige tekserý júrgizilip, maska rejımin saqtamaǵan 8 adam anyqtaldy. 87 510 teńge kóleminde 2 hattama toltyryldy», - delingen ShQO aqparat ortalyǵy taratqan málimette.

Altaı aýdanynda reıd barysynda 36 obekti qamtylyp, karantın talabyn buzǵan 1 adam tirkeldi. Budan bólek, Glýbokoe aýdanynda qoǵamdyq orynda maska taqpaı júrgen azamatqa 43 755 teńge mólsherinde aıyppul salynǵan.