Shyǵys Qazaqstanda shekteý sharalary 14 aqpanǵa deıin uzartyldy
ShQO bas memlekettik sanıtar dárigeri mindetin atqarýshynyń jańa qaýlysy jarııalandy.
Onda óńirdegi karantın shekteýleri 14 aqpanǵa deıin qaıta sozylatyndyǵy kórsetilgen.
Shekteý sharalarynyń merzimi oblys aýmaǵynda COVID-19 ınfektsııasynyń taralýy boıynsha ahýaldyń ózgerýine sáıkes qaıta qaralýy múmkin.
«Óńirdiń syrtqy shekaralaryna kirip-shyǵýdy baqylaý úshin Almaty oblysy aýmaǵyna - 3, al Pavlodar oblysymen shekteser tusqa - 2 sanıtarlyq post qoıyldy. Olardyń jumysyn Kýrchatov qalasynyń, Besqaraǵaı, Úrjar, Borodýlıha, Shemonaıha, Zaısan aýdandarynyń ákimderi, ShQO densaýlyq saqtaý basqarmasy, memlekettik kirister jáne polıtsııa departamentteri, qalalar men aýdandardyń sanıtarııalyq-epıdemılogııalyq baqylaý basqarmalary qamtamasyz etedi. Qoǵamdyq tamaqtaný oryndarynda, oıyn-saýyq obektilerinde, kásiporyndarda, mekemelerde jáne keńselerde buqaralyq oıyn-saýyq is-sharalardy, sporttyq sharalardy, jınalystardy, kórmelerdi, forýmdar men konferentsııalardy ótkizýge tyıym salynǵan. Buqaralyq, otbasylyq, saltanatty jáne eske alý sharalaryn (banketter, úılený toılary, mereıtoılar, as berý) úıde ótkizýge jáne meshitterde juma namaz oqýǵa ruqsat berilmedi», - delingen qujatta.
Qarttar men múmkindigi shekteýli adamdarǵa arnalǵan medıtsınalyq uıymdarda, medıtsınalyq-áleýmettik obektilerde, sábıler jáne balalar úılerinde, áleýmettik ońaltý ortalyqtarynda, múgedek balalarǵa arnalǵan ınternat úlgisindegi oqý oryndarynda sanıtarlyq-dezınfektsııalyq rejım saqtalady.
«Fıtnes-ortalyqtar, klýbtar, basseınder, jattyǵý zaldary men saýnalar jalpy toltyrylýy 50%-dan aspaı jumys isteıdi. Qalalar men eldi mekender ishinde qoǵamdyq kólik úshin jumys rejımi saǵat 06.00-den 23.00-ge deıin belgilendi. Tańerteń saǵat 8.00-den 10.00-ge deıin, keshke saǵat 18.00-den 20.00-ge deıin avtobýs sany arttyrylady. Kondýktorlar men jolaýshylar mindetti túrde maska kııýleri tıis», - delingen qaýlyda.