Shyǵys Qazaqstanda saılanǵan 77 aýyl ákimi óz jumysyn bastady

ÓSKEMEN. QazAqparat – Shyǵys Qazaqstan oblysynda bıýlletenderge engizilgen 232 kandıdattyń ishinen 77 aýyl ákimi saılandy, dep habarlaıdy QazAqparat tilshisi.

ShQO Aqparat ortalyǵynyń málimetine súıensek, saılaýda bes partııanyń ókilderi men ózin-ózi usynǵan kandıdattar jeńiske jetti. Ákimderdiń 46-sy óz aýyldyq okrýgteri boıynsha qaıta saılansa, 4-i basqa okrýgtiń ákimi boldy.

Eń jas ákim Darhan Tóleýhanov 29-da. Endi ol Ulan aýdany Aıyrtaý aýyldyq okrýginiń ákimi laýazymyn atqarady. Al Úrjar aýdany Maqanshy aýyldyq okrýginiń jańa basshysy atanǵan 61-degi Sovetqan Qalıev jasy eń úlken ákim bolyp otyr.

«77 ákimniń 8-i áıel adam. Bilimderine qatysty aıtar bolsaq, aýyl ákimderi arasynda 23 muǵalim, 16 zańger, 15 aýyl sharýashylyǵy salasynyń qyzmetkeri, 9 ekonomıst, 8 ınjener jáne 6 basqa mamandyq ókili bar. Qazirgi ýaqytta aýdan ákimderi saılanǵan aýyl ákimderin turǵyndarǵa tanystyryp, birqatar tapsyrma júktedi», - delingen habarlamada.