Shyǵys Qazaqstanda respýblıkalyq mańyzy bar jol jabyldy
ÓSKEMEN. QazAqparat – Shyǵys Qazaqstan oblysynda qar kóshkini júrý qaýpine oraı tasjoldardyń biri jabyldy, dep habarlaıdy QazAqparat tilshisi.
ShQO tótenshe jaǵdaılar departamenti baspasóz qyzmetiniń málimetine súıensek, óńirdegi tasjoldardyń birin qar kóshkini jaýyp qalýy múmkin.
«Respýblıkalyq mańyzy bar «Óskemen-Altaı-Katonqaraǵaı-Rahman qaınary» tasjolynyń 420-450 shaqyrymynda (Berel aýylynan Rahman qaınary sanatorıine deıingi aralyq) kóliktiń barlyq túrleri úshin qozǵalysqa tyıym salynady», - delingen aqparatta.
Osy rette qutqarýshylar óńir jurtshylyǵyna alys saparǵa shyǵar aldynda joldardyń jaı-kúıin «Dármen» mobıldi qosymshasy arqyly tekserip otyrýǵa keńes berdi.
