Shyǵys Qazaqstanda perzenthanalardy jabdyqtaý úshin arnaıy baǵdarlama iske asyrylýda
ÓSKEMEN. QazAqparat – Shyǵys Qazaqstan oblysynda 2021 jyly perzenthanalardy jabdyqtaý úshin arnaıy baǵdarlama iske asyrylady, dep habarlaıdy QazAqparat tilshisi.
Óńirde medıtsınalyq kómektiń sapasyn arttyrý maqsatynda ana men balanyń densaýlyǵyn saqtaý jóninde arnaıy baǵdarlama iske asyrylýda. Sonyń nátıjesinde, 3 aýyldyq medıtsınalyq uıymdy І deńgeıge, 9 aýdandyq jáne 2 aýdanaralyq aýrýhanany І deńgeıden ІІ deńgeıge aýystyrý josparlanǵan. Bul qıyn jaǵdaıdaǵy áıelderdi bosandyrýǵa jáne salmaǵy 1500 gramnan bastalatyn nárestelerdi kútýge múmkindik beredi.
«Sondaı-aq ІІІ deńgeıli perzenthanalar da tıisti jabdyqtarmen qamtylady. Osylaısha salmaǵy 500 gramnan asatyn nárestelerdi kútýge múmkindik týmaq. Jalpy 2021 jyly 3,3 mlrd teńgege ana men balanyń densaýlyǵyn saqtaýǵa qajetti medıtsınalyq jabdyqtar satyp alynady», - dedi Danıal Ahmetov halyqqa esep berý barysynda.
Onyń aıtýynsha, óńirde balalar men eresekterge arnalǵan mamandandyrylǵan gematologııa ortalyǵynyń qurylysy jalǵasýda. Bul medıtsınalyq mekeme 2022 jyly paıdalanýǵa berilmek.
«Osylaısha, gematologııa, ıadrolyq medıtsına, robottandyrylǵan hırýrgııa ortalyqtaryn biryńǵaı júıege biriktire otyryp, medıtsınalyq týrızmdi damytýǵa negiz bolatyn qýatty medıtsınalyq klaster qurylady. Budan bólek, osy jyly medıtsına salasynyń mamandaryn oqytýdyń úsh deńgeıli baǵdarlamasyn 3 jylǵa (2021-2024 jj.) túzetý, Semeı qalasynyń Jedel medıtsınalyq járdem aýrýhanasynyń patsıentteri men medıtsınalyq personaly qaýipsizdiginiń halyqaralyq standartyna sáıkes JCI attestattaýdy ótkizýdi, ıAdrolyq medıtsına ortalyǵynyń bazasynda radıoıodterapııa júrgize otyryp, radıonýklıdtik terapııa bólimshesin ashýdy kózdep otyrmyz», – dedi aımaq basshysy.
