Shyǵys Qazaqstanda ózenderdegi muzdy jaryp jatyr
ÓSKEMEN. QazAqparat - Shyǵys Qazaqstanda sý tasqynynyń aldyn alý maqsatynda ózenderdegi muzdy jarý bastaldy, dep habarlaıdy QazAqparat tilshisi Tótenshe jaǵdaılar departamentine silteme jasap.
Jalpy, oblysta 27 qaýipti ýchaske bar. Olar Ertis, Úlbi, Buqtyrma, Qaljyr, Kúrshim ózenderinde ornalasqan. Osy aptada Shemonaıha jáne Altaı aýdandarynda ózenderge jarylǵysh zattar ornatylady. Aldyn ala baıqap kórý úshin osy kúnderi mamandar Joǵarǵy Úlbi ózeninde alǵash ret muzdy jardy.
Muz jarý jumystary oblystyń Altaı, Besqaraǵaı, Kúrshim, Qatonqaraǵaı, Borodýlıha, Shemonaıha aýdandarynda jáne Semeı qalasynda júrgiziledi.
Muz jarý jumystarynyń qaýipsiz bolýyn aýdandyq tótenshe jaǵdaılar bólimderiniń qyzmetkerleri qadaǵalaıdy. Jarylystardyń keıbiri eldi mekenderge jaqyn mańda bolady, sondyqtan, aýa tolqyny men seısmıkalyq kúshti azaıtý maqsatynda mundaǵy jarylystardyń kúshi álsizdeý, biraq kezek-kezegimen uıymdastyrylady.
Lıýdmıla Malko
