Shyǵys Qazaqstanda ótken demalys kúnderi 9 órt shyqty
ÓSKEMEN. QazAqparat – Shyǵys Qazaqstan oblysynda ótken senbi-jeksenbi kúnderi 9 órt boldy, dep habarlaıdy QazAqparat tilshisi.
ShQO Tótenshe jaǵdaılar departamenti baspasóz qyzmetiniń málimetine súıensek, Ulan aýdany Saratovka aýylyndaǵy jeke turǵyn úıden órt shyqty. Oqıǵa ornyna №38 órt sóndirý bóliminiń qyzmetkerleri shuǵyl kelip jetken.
«Kýágerlerdiń aıtýynsha, janyp jatqan úıge 72 jastaǵy qarııa kirip ketken. Ol ishke kirisimen gaz ballondary jaryldy. Qutqarýshylar úıden 2 gaz ballonyn shyǵaryp, jalyndy aýyzdyqtaýǵa kiristi. Sálden soń úı ıesiniń máıiti tabylǵan. Órttiń shyǵý sebebi - otty abaısyz qoldanýdan bolýy múmkin», - delingen aqparatta.
Abaı aýdany Qaraýyl aýylynda 2010 jyly shyqqan «Nıva Shevrole» markaly avtokóligi jandy. Ol jer úıdiń aýlasynda turǵan. 4 sharshy metr alańdaǵy tilsiz jaý tolyqtaı óshirildi.
20 aqpanda Altaı qalasyndaǵy Kalınınskaıa kóshesinde jeke turǵyn úıdiń aýlasyndaǵy monsha órtengen. Sondaı-aq Kókpekti aýdanynyń ortalyǵynda dúkenniń shatyry otqa orandy.
«Úrjar aýdanyndaǵy demalys bazasynyń aýmaǵynda monshadan órt shyqty. Qyzyl jalyn sharpyǵan jalpy aýdan 210 sharshy metrdi quraǵan. Aldyn ala málimet boıynsha órttiń shyǵý sebebi – elektr jabdyqtaryn paıdalaný kezinde qaýipsizdik talaptaryn saqtamaý bolýy múmkin», - delingen habarlamada.
Budan bólek, Altaı, Shemonaıha, Tarbaǵataı aýdandarynda órt boldy.
