Shyǵys Qazaqstanda órtten kóz jumǵandar sany 27 paıyzǵa kóbeıdi
ShQO tótenshe jaǵdaılar departamenti baspasóz qyzmetiniń málimetine súıensek, bıylǵy jylytý maýsymynda óńir boıynsha órt sany 11,1%-ǵa tómendegen. Alaıda qyzyl jalynnan kóz jumǵandar kerisinshe kóbeıip otyr. Naqty aıtqanda, 11 adamdy qurap, byltyrǵy kezeńmen salystyrǵanda 27,2%-ǵa artqan.
«Jylytý maýsymy bastalǵaly tilsiz jaýdan zardap shekkender sany 37%-ǵa artty. Jazataıym oqıǵalardyń negizgi sebepteri – órt qaýipsizdigi erejelerin saqtamaý, peshtegi jaryq jáne pesh murjasynyń tazalanbaýy. Órt kóbinese jer úılerden shyǵady (54,2%). Qutqarýshylar órttiń aldyn alý úshin 190 000-nan astam aýlany aralap shyqty. Nátıjesinde, úılerde qaýipsizdik talaptaryn buzýdyń 44 689 faktisi tirkeldi», - deıdi oblystyq TJD memlekettik órt baqylaý basqarmasynyń bastyǵy Nurjan Ómirjanov.
Jalpy oblys aýmaǵynda pesh jaǵyp otyrǵan áleýmettik osal sanattaǵy 3174 otbasy bar. Departament mamandary jergilikti atqarýshy organdarmen birlesip, sol úılerdi eki ret aralap shyqqan. Barlyǵy 2357 buzýshylyq anyqtaldy. Qazirgi ýaqytta 440 buzýshylyq joıylǵan.
Jylytý maýsymy bastalǵaly beri demeýshilerdiń kómegimen áleýmettik osal sanattaǵy otbasylardyń úılerine ýly gazdy anyqtaıtyn 2476 datchık ornatyldy.
Foto: ShQO aqparat ortalyǵy