Shyǵys Qazaqstanda ormannan órt shyqty
ShQO Tótenshe jaǵdaılar departamenti baspasóz qyzmetiniń málimetine súıensek, 1 shildede Ulan aýdanynda ornalasqan Prımorsk ormanshylyǵyndaǵy taýly jerde órt shyqty. Ormanshylar men órt sóndirýshiler shuǵyl túrde sol jerge kelip jetti.
«Bul jartasty jerde shamamen 0,7 gektar aýmaqta shóp janyp jatyr. Qazirgi ýaqytta ashyq jalyn joq. Órt ornyna tehnıkamen jetý múmkin emes. Sondyqtan tehnıka taýlardyń eteginde múmkindiginshe jaqyn jerge toqtady. Ormanshylar men órt sóndirýshiler taý betkeılerin eńserip, rıýkzakty órt sóndirgishterdiń kómegimen tilsiz jaýmen kúresýde», - delingen aqparatta.
Budan bólek, ShQO áýe bólimshesiniń MI-2 tikushaǵymen órt ornyna ormanshylardyń desanty jetkizildi.
Eldi mekenderge tónip turǵan qaýip joq. Sol jerge barlyǵy 83 adam, 10 tehnıka jumyldyrylǵan.