Shyǵys Qazaqstanda orman órti órship tur
ÓSKEMEN. QazAqparat – Óskemende Shyǵys Qazaqstan oblysy ákiminiń orynbasary Baqytjan Baıahmetovtiń basshylyǵymen tótenshe jaǵdaılardyń aldyn alý jónindegi komıssııanyń onlaın-otyrysy ótti, dep habarlaıdy QazAqparat tilshisi.
ShQO Tótenshe jaǵdaılar departamenti mamandarynyń málimetine súıensek, óńirde 217 orman órti tirkelgen. Bul kórsetkish ótken jylmen salystyrǵa 50,7%-ǵa artyp otyr. Osynyń saldarynan 4699,01 gektar orman alqaby órtenip ketti. Sondaı-aq oblys aýmaǵynda 7 dala órti tirkelgen.
Órt qaýipsizdigin qamtamasyz etý maqsatynda departament jalpy sany 432 adamnan turatyn azamattyq qorǵaý, jergilikti polıtsııa qyzmeti, orman sharýashylyǵy mekemeleri jáne jergilikti atqarýshy organdardyń arasynan 70 birlesken mobıldi top qurdy. Mobıldi toptar 601 reıd júrgizgen.
Sonyń nátıjeleri boıynsha órt qaýipsizdigi talaptaryn buzýdyń 135 jaǵdaıy anyqtaldy.
Onlaın-kezdesýdiń ekinshi taqyryby - óńirdiń qys mezgiline daıyndyǵy boldy. Shyǵys Qazaqstan oblysynda jyl saıyn qalyń qar men kóktaıǵaqqa baılanysty joldarda qolaısyz jaǵdaı qalyptasady.
Máselen, ótken jyldyń qys mezgilinde oblystyq mańyzy bar joldar 273 ret jabylǵan. 275 adam qar qursaýynan qutqarylyp, 1168 adam evakýatsııalandy. Tótenshe jaǵdaı kezinde jedel áreket etý úshin jeke quramnan 2273 adam men 1100 tehnıka jumyldyrylǵan.
