Shyǵys Qazaqstanda orman órti 41%-ǵa ósti
ÓSKEMEN. QazAqparat – Shyǵys Qazaqstan oblysynda bıylǵy órt maýsymy bastalǵaly beri 192 orman órti tirkelgen, dep habarlaıdy QazAqparat tilshisi.
Óńirde orman órtteriniń aldyn alý maqsatynda birqatar sharalar qolǵa alynýda. Bul jaıly ShQO óńirlik kommýnıkatsııalar qyzmetinde ótken baspasóz brıfıngi barysynda oblystyq Tótenshe jaǵdaılar departamenti bastyǵynyń mindetin atqarýshy Dmıtrıı Tıtov málimdedi.
«Órt maýsymy bastalǵaly beri Shyǵys Qazaqstandaǵy memlekettik orman qorynyń aýmaǵynda 192 orman órti tirkeldi. Qyzyl jalynnyń jalpy aýmaǵy 456 074 gektardy quraǵan. Ókinishke qaraı, aımaqtaǵy orman órti 41 paıyzǵa artyp otyr», - dedi ol.
Esterińizge sala keteıik, 2020 jyldyń sáýir aıynda «Semeı ormany» memlekettik orman tabıǵı rezervaty aýmaǵyndaǵy qaraǵaıly ormanda órt shyqqan bolatyn. Tilsiz jaý saldarynan 3500 gektarǵa jýyq orman alqaby órtendi.
Órttiń 90%-y naızaǵaıdan shyqsa, qalǵan 10%-ynda adamdardyń otpen abaısyz áreket etýinen týyndaýda. Shyǵys Qazaqstandaǵy memlekettik orman qorynyń aýmaǵy 3,8 mıllıon gektardy quraıdy. Bıyl osy aýmaqty qorǵaý maqsatynda tıisti sharalar qolǵa alyndy.
«Ormandy qorǵaý maqsatynda oblysta 70 mobıldi top quryldy. Onyń quramynda azamattyq qorǵanys, jergilikti polıtsııa qyzmeti, orman mekemeleri men aýdandyq ákimdik ókilderi bar. 382-den astam profılaktıkalyq reıd júrgizilip, 127 zańbuzýshylyq anyqtaldy. Tártip buzǵan azamattar ákimshilik jaýapkershilikke tartyldy, - dedi Dmıtrıı Tıtov.
ShQO aýmaǵynda órt qaýpi kezeńi 1 qarashaǵa deıin jalǵasady. Eger siz bir jerde órt shyqqanyn baıqap qalsańyz birden «101» nómirine qońyraý shalyńyz.
