Shyǵys Qazaqstanda operatsııany endi robot jasaıdy
ÓSKEMEN. QazAqparat - Óskemendegi №1 qalalyq aýrýhanaǵa elimizde teńdesi joq ota jasaıtyn robot satyp alyndy, dep habarlaıdy egemen.kz.
Atalǵan qurylǵy osy emhana bazasynda jýyqta ashylatyn robottandyrylǵan hırýrgııa jáne transplantatsııa ortalyǵynda ornalastyrylatyn bolady.
«Robot hırýrgııalyq, ýrologııalyq, gınekologııalyq otanyń barlyǵyn jasaı beredi. Ota deneni keskilemeı, birneshe jerden tesý arqyly jasalady. Reseıde Da Vınchı markaly robottar bar. Onyń quraldary bir otadan keıin jaramsyz bolyp qalady. Jańalap otyrý qajet. Al biz alǵan robot uzaq merzimge arnalǵan. Sondyqtan baǵasy da qymbat», - deıdi atalǵan emhananyń bas dárigeri ıÝrıı Starokojev.
Onyń aıtýynsha, robot aldaǵy ýaqytta aýrýhanada jasalatyn barlyq otanyń 30-40 paıyzyn óz moınyna almaq. Qazirgi ýaqytta robotty tehnıkaǵa qajetti qural-jabdyqtardyń barlyǵy jetkizilipti, tek bloktaǵy jóndeý jumystaryn aıaqtaý qalypty.
«Bul ortalyqtyń ashylýy medıtsınalyq týrızmdi damytýǵa serpin beredi dep oılaımyz. Óıtkeni, munda oblys pen elimizdiń turǵyndary ǵana emes, reseılikter de emdeledi degen josparymyz bar», - deıdi oblystyq densaýlyq saqtaý basqarmasynyń basshysy Marat Shoranov. Oblys ákimi Danıal Ahmetov Jańa jyl qarsańynda osy ortalyq jumysymen tanysyp, Londonnyń eń úzdik aýrýhanalarynda biliktilikterin shyńdap, arnaıy kýrstardan ótip kelgen óńirdiń medıtsınalyq qyzmetkerlerimen kezdesti. Bul mamandar robottandyrylǵan hırýrgııa, ana jáne bala ómiri, onkologııa, júrek-qantamyrlary aýrýlary boıynsha óz bilimderin jetildirip oralǵan bolatyn.
«Bizdiń oblystyq aýrýhanadan 13 adam Germanııa men Anglııada bilimderin jetildirip qaıtty. Menen basqasynyń bári 30-35 jastaǵy mamandar. Batystan úırenetin basty dúnıe - uzyn-sonar kezektiń joqtyǵy. Mundaı júıe bizdiń dıagnostıkalyq ortalyqta bar. Sol tásildi oblystyq aýrýhanaǵa da engizemiz. Olarda shuǵyl túsken naýqastar bólek qabyldanady. Qalǵan naýqastar «josparly gospıtal» bóliminde qaralady. Biz de jańa modýl salyp, shuǵyl medıtsınalyq kómek blogyn ashpaqpyz», - deıdi oblystyq aýrýhananyń meńgerýshisi Jaıyq Jumahanov.
Oblys ákimi D.Ahmetov bul baǵyttaǵy jumys toqtamaıtynyn aıtyp, sanıtarlyq qyzmetkerdiń de eýropalyq medıtsına deńgeıimen tanysýy kerektigin aıtty. «Medıtsınanyń sapasyn kóterý úshin zamanaýı quraldar alý jetkiliksiz. Sondyqtan bul jumys jalǵasady. Endi ózderińiz oqyp kelgen jetekshi klınıkalarmen áriptestik baılanys ornatyńyzdar. Olardyń bilikti mamandary osynda otalarǵa qatysyp, praktıkalyq sabaq júrgizsin. Bolashaqta Zyrıan, Aıagóz qalalarynda, Úrjar aýdanynda ınsýlt ortalyǵyn ashýymyz múmkin. Onda da sońǵy úlgidegi quraldar men shetelden bilimin jetildirgen mamandar jumys isteıtin bolady. Dárigerlerge úlken múmkindik usynyp otyrmyz. Oǵan ilese almaǵandar kóshten qala beredi», - deıdi aımaq basshysy.
