Shyǵys Qazaqstanda oblys ákiminiń Biryńǵaı ahýal ortalyǵy jumysyn bastaıdy

ASTANA. QazAqparat - Shyǵys Qazaqstan oblysynda tótenshe jaǵdaılar, kommýnaldyq jáne apat qyzmetterin bir qosymshaǵa biriktiretin júıe iske qosylady, dep habarlaıdy QazAqparat Altaynews.kz saıtyna silteme jasap.

Oblys ákimi Danıal Ahmetovtiń aıtýynsha, qosymsha arqyly TJ qyzmetterimen baılanysýǵa, kommýnaldyq qyzmetterdiń aqysyn tóleýge, avtobýstardyń qozǵalysyn baqylaýǵa jáne bıletterdi satyp alýǵa bolady.

«Ortalyqty iske qosqan soń tsıfrlandyrýdyń osy segmentinde álemdik deńgeıge shyǵamyz», - dedi Danıal Ahmetov.

ShQO ákiminiń apparat basshysynyń orynbasary Marına Gagarınanyń sózine qaraǵanda, 2019 jyly tsıfrlandyrý aıasynda basqa da jobalar iske asyrylady. Atap aıtqanda, «Senymdy dariger» qosymshasyn, «Qurylys baqylaý» aqparattyq júıesin, aýyl sharýashylyǵy janýarlaryn, tehnıkasyn jáne jer qatynastaryn tirkeıtin «Smart-Agro» ortalyqtanǵan aqparattyq júıesin iske qosý, eldi mekenderdegi jer ýchaskeleriniń kadastr qunyn onlaın baǵalaý jobalary josparda tur.

«Balabaqshalar men mektepterdiń barlyǵyna vıdeobaqylaý júıesin ornatyp, ony qaýipsizdikti qamtamasyz etý júıelerine qosamyz. Budan tys, 2019-2021 jyldarǵa arnalǵan taǵy bir jobamyz bar. Ol - oblystyq arhıvtiń qoryn, oblystyq kitaphananyń sırek kezdesetin kitaptaryn, oblystaǵy mýzeılerde turǵan tarıhı jáne arheologııalyq qundylyqtardyń tsıfrlyq nusqasyn jasaý jobasy», - deıdi Marına Gagarına.

Eske sala keteıik, byltyr Óskemen jáne Semeıdegi jer ýchaskeleriniń elektrondy kartalary ázirlengen bolatyn. Bıyl Shyǵys Qazaqstan oblysynyń Rıdder, Aıagóz, Shemonaıha, Serebrıansk, Zaısan, Altaı qalalarynda da osyndaı kartalar jasalady.