Shyǵys Qazaqstanda menıngıtke jyl basynan 4 bala shaldyqty
ÓSKEMEN. QazAqparat - Sońǵy 5 jyl ishinde Shyǵys Qazaqstanda menıngokokk juqpasynyń órshýi baıqalmaǵan. Oblystyq qoǵamdyq densaýlyq saqtaý departamentiniń basshysy Ǵazez Súleımenov QazAqparat tilshisine atalmysh aýrý boıynsha óńirdegi ahýal týraly aıtyp berdi.
«2016 jyly 6 aýrý jaǵdaıy tirkelse, 2017 jyly 7 jaǵdaı anyqtaldy. Ony juqtyrǵandardyń kóbi 14 jasqa deıingi balalar. Aýrýshańdyq ásirese Semeı (4 jaǵdaı), Óskemen (2 jaǵdaı) qalalary men Zyrıan aýdanynda (1 jaǵdaı) baıqaldy. Juqpaǵa tap bolǵandar arasynda 2-6 jas aralyǵynda balalardyń úlesi 85,7 paıyz» - deıdi Ǵazez Súleımenov.
Byltyrǵy 7 jaǵdaıdyń úsheýi adam ólimimen aıaqtalǵan.
Al bıyl alǵashqy bes aıda 4 jaǵdaı tirkelipgen. Onyń úsheýi Semeıde, bireýi Zyryn aýdanynda turatyn balalar. Barlyǵyna juqpanyń asqynǵan túri «menıngokoktsemııa» dıagnozy qoıylyp, emdelip shyqqan. Naýqas balalarmen qatynasta bolǵan 89 adam zerthanalyq tekserýden ótip, aýrýdan ada ekeni naqtylanǵan.
«Qazir búkil oblys boıynsha aýrýshańdyqqa kúndelikti monıtorıng júrgizilýde. Juqpa qozdyrǵyshtaryn tasymaldaýshylardy anyqtaý úshin 193 adam tekserildi, nátıjesi teris. Adamdar kóp jınalatyn saýda oryndary men sporttyq sektsııalarda, kınoteatrlar men kóńil kóterý oryndarynda, meshitterde menıngıttiń aldyn alý týraly jadynamalar taratylyp jatyr» - deıdi departament basshysy.
