Shyǵys Qazaqstanda mal urlyǵymen aınalysqan 12 adam ustaldy
ÓSKEMEN. QazAqparat – Shyǵys Qazaqstan oblysynda polıtsııa qyzmetkerleri mal urlyǵymen aınalysqan 12 adamdy ustady, dep habarlaıdy QazAqparat tilshisi.
ShQO Polıtsııa departamenti baspasóz qyzmetiniń málimetine súıensek, tártip saqshylary óńir aýmaǵynda «Mal urlyǵy» jedel aldyn alý sharasyn júrgizgen. Sonyń nátıjesinde, 10 kún ishinde 21 qylmys ashyldy.
«Sondaı-aq mal urlyǵymen aınalysqan 12 adam ustaldy. Mysaly, Zaısan aýdanynda jaıylymnan jalpy quny 3 000 000 teńgeden asatyn 10 bas mal urlaǵan 38 jastaǵy aýyl turǵyny quryqtaldy. Qazirgi ýaqytta oǵan qatysty QR QK-niń 188-baby 1-bóligine sáıkes sotqa deıingi tergeý amaldary júrgizilýde», - delingen aqparatta.
Budan bólek, mal jáne et ónimderin tasymaldaǵan 1 500-den astam avtokólik, 1 137 sharýa qojalyǵy jáne mal jáne et ónimderin satatyn 500-den astam bazarlar, dúkender men pavılondar tekserildi.
Mal jaıý erejelerin buzǵany úshin 336 adam ákimshilik jaýapkershilikke tartyldy. 1000-nan astam qaraýsyz jaıylǵan mal arnaıy turaqqa qamaldy.
