Shyǵys Qazaqstanda mal bazary ashylmaq

ÓSKEMEN. QazAqparat - Shyǵys Qazaqstan oblysy Ulan aýdanynda mal bazary ashylady, dep habarlaıdy QazAqparat tilshisi.

ShQO ákimi baspasóz qyzmetiniń málimetine súıensek, Ulan aýdanyndaǵy «Mýhamadı» sharýa qojalyǵynyń bazasynda tiri maldy, aýyl jáne mal sharýashylyqtary ónimderin satatyn bazar ashý josparlanýda.

- Bul bazarda kórshi sharýashylyqtyń fermerleri ósirgen ónimderin sata alady. Sondaı-aq satylmaǵan maldy sol jerdegi bordaqylaý alańyna qaldyrýǵa bolady. Al satyp alýshylar úshin mal soıý, etti múshelep buzý jáne ystaý qyzmetteri qarastyrylǵan, - delingen habarlamada.

Atalmysh sharýa qojalyq respýblıkalyq tasjoldyń boıyndaǵy «Atyǵaı» asýynda ornalasqan. Sondyqtan bul jerdiń tańdalýy kezdeısoq emes. Mal bazary Ulan aýdanynyń jurtyna jáne oblystyń basqa eldi mekenderinen keletin turǵyndar úshin de yńǵaıly bolmaq.