Shyǵys Qazaqstanda qyrkúıek aıynda plazma banki qurylady
ÓSKEMEN. QazAqparat – Shyǵys Qaqazsqtan oblysynyń ákimi Danıal Ahmetov koronavırýstan jazylyp shyqqan ári antıdenesi bar óńir turǵyndarynyń qan plazmasynan jınaqtalǵan bankti 19 qyrkúıekke deıin ashýdy tapsyrdy, dep habarlaıdy QazAqparat tilshisi.
Aımaq basshysy bankte kem degende 1000 doza bolýy kerektigin atap ótti.
«Biz qazan aıyndaǵy koronavırýstyń ekinshi tolqynyna daıyn bolýymyz qajet. Qazirden bastap plazma bankin qurý úshin tıisti jumystar atqarylýy tıis. Shyǵys Qazaqstanda 4 409 adam koronavırýs ınfektsııasymen aýyryp, jazylyp shyqty. Olardyń qan plazmasy arqyly ózge naýqastardyń aýrýdan saýyǵyp ketýine kómektese alamyz», - dedi Danıal Ahmetov.
Onyń aıtýynsha, plazma bankin qurýǵa jedel túrde kirisý kerek. Búginde medıtsınalyq mekemelerdegi bas dárigerler men ákimderdiń negizgi mindeti - halyqqa qan plazmasyn tapsyrýdyń mańyzyn túsindirý.
Aıta keteıik, ShQO-daǵy medıtsınalyq mekemeler úzdik tehnıkalyq jabdyqtarmen qamtamasyz etilgen. 27 aýrýhana, onyń basym bóligi aýdandyq aýrýhanalaryń árqaısysynda ortasha eseppen 5 kontsentrator bar. «Shyǵysqazaqstandyq dárigerlerge COVID-19 ınfektsııasymen kúresýdegi tájirıbelerimen bólisken Tatarstan Respýblıkasynyń medıtsına qyzmetkerleri óńirdegi statsıonarlardyń medıtsınalyq preparattarmen jabdyqtalýyna oń baǵa berdi»,-delingen habarlamada.
Danıal Ahmetov oblystyń maýsymdyq aýrýlarǵa daıyn ekenin atap ótti. Máselen, tumaýǵa qarsy vaktsına egý jumystaryna daıyndyq júrgizilýde. Medıtsınalyq mekemelerge 20 000 vaktsına jetkizý josparlanýda. Vaktsına muqtaj jandarǵa tegin salynady.
