Shyǵys Qazaqstanda kún saıyn 15-ten astam dala órti tirkelýde

ÓSKEMEN. QazAqparat – Shyǵys Qazaqstan oblysynda kún saıyn 15-ten astam dala órti tirkelýde, dep habarlaıdy QazAqparat tilshisi.

ShQO tótenshe jaǵdaılar departamenti baspasóz qyzmetiniń málimetine súıensek, qutqarýshylar kún saıyn táýligine 15-20 retke deıin dala órtin sóndirýge barady. Mundaı órtterdi aýyzdyqtaýdyń qıyndyǵy – ot iri aýmaqqa jyldam tarap ketedi.

«Órt qaýpi joǵary kezeńde óńirde órt ınspektorlary, ormanshylar, polıtsııa qyzmetkerleri jáne jergilikti atqarýshy organ ókilderi qatarynan jalpy sany 300-ge jýyq adamnan turatyn 46 mobıldi top qurylǵan. Olar 280-nen astam ret reıdke shyqty. Sonyń nátıjesinde, órt qaýipsizdigi talaptaryn buzǵan 32 adam ákimshilik jaýapkershilikke tartyldy», - deıdi departamenttiń memlekettik órt baqylaý basqarmasynyń bastyǵy Nurjan Ómirjanov.

Osy rette, oblystyq TJD qyzmetkerleri turǵyndarǵa qaýipsizdik erejelerin eske saldy:

- Terek mamyǵy ot ushqynynan da tutanady, tez janyp, jan jaqqa taraıdy.

- Kommýnaldyq qyzmetter men halyq aýlalardy, garaj kooperatıvterin qoqystan tazartýy kerek.

- Sóndirilmegen temeki tuqylyn jerge tastamańyz. Ata-analar balalaryna sirińkemen oınaýdyń qaýiptiligi týraly túsindirýi tıis.

- Dalada shóp órtemeńiz.

- Saıajaılarda alǵashqy órt sóndirý quraldaryn qoljetimdi jerde ustańyz.