Shyǵys Qazaqstanda kóshkin júrý qaýpi bar kezeńge daıyndyq jumystary bastaldy
ÓSKEMEN. QazAqparat – Shyǵys Qazaqstan oblysynda kóshkin júrý qaýpi bar kezeńge daıyndyq jumystary bastaldy, dep habarlaıdy QazAqparat tilshisi.
ShQO TJD baspasóz qyzmetiniń málimetine súıensek, tótenshe jaǵdaılar jónindegi oblystyq komıssııanyń kezekti otyrysy ótti. Onda qysqa jáne kóshkin qaýpi bar kezeńge ázirlik, muz qatý kezeńinde sý aıdyndarynda qaýipsizdikti uıymdastyrý jumystary talqyǵa salyndy.
«Qazseldenqorǵaý» ShQ fılıaly basshysynyń mindetin atqarýshy Sovetbek Stanbekov óńirde 15 qarashadan bastalatyn kóshkin qaýpi bar kezeńge daıyndyq týraly baıandady.
«Shyǵys Qazaqstan respýblıkanyń qar kóshkini qaýpi joǵary óńirleriniń biri. Onda kóshkin júrý qaýpi bar 497 ýchaske tirkelgen. 336 ýchaske sharýashylyq sýbektileri men adamdardyń ómirine qaýip tóndiredi. Ásirese avtojol boıyndaǵy oshaqtar qaýipti. Jalpy uzyndyǵy 105 shaqyrym jol qar kóshkinine ushyraıdy. Osyǵan baılanysty demalys aımaqtaryndaǵy, shańǵy bazalaryndaǵy kóshkin qaýpi bar jerlerde 48 eskertý ornatylǵan. Altaı aýdanynda jáne Katonqaraǵaı aýdanynda 70 qar ustaıtyn qalqan jóndeldi. Kóshkin qaýpi týraly halyqqa SMS-habarlama, BAQ jáne «Darmen» mobıldi qosymshasy arqyly habarlanatyn bolady», - dedi ol.
Muz qatý kezeńinde sý aıdyndaryndaǵy qaýipsizdik máselesi tóńireginde ShQO TJD Azamattyq qorǵanys basqarmasynyń bastyǵy Rýslan Orynbekov sóz qozǵady.
«Oblys halqynyń muz ústinde balyq aýlaıtyn 54 orny anyqtalǵan. Eń kóp oryn Ulan aýdanynda - 17, Kúrshim aýdanynda - 11 jáne Altaı aýdanyna - 6. Balyq aýlaý kezinde jazataıym oqıǵalardyń aldyn alý maqsatynda byltyr TJD qyzmetkerleri polıtsııamen, jergilikti atqarýshy organdarmen jáne volonterlik uıymdarmen birlesip 129 ret reıd ótkizdi. Olardyń barysynda halyqqa kúzgi-qysqy kezeńde sý aıdyndarynda júris-turystyń negizgi qaǵıdalary jetkizildi», - deıdi R. Orynbekov.
Ashyq kózderden alynǵan foto
