Shyǵys Qazaqstanda qos azamattyqpen júrgen 20 adam anyqtaldy
ShQO polıtsııa departamenti baspasóz qyzmetiniń málimetine súıensek, jyl basynan beri óńir boıynsha qos azamattyqpen júrgen 20 adam anyqtalǵan. Onyń ishinde shetel azamattyǵyn alǵannan keıin qazaqstandyq qujattardy ýaqtyly tapsyrmaǵany úshin 13 adam ákimshilik jaýapkershilikke tartyldy. Olardyń úsheýi sot sheshimimen Qazaqstan Respýblıkasynan tys jerge shyǵaryldy.
«Máselen, mamyr aıynda Kóshi-qon qyzmetiniń mamandary ótken jyldyń shilde aıynda basqa eldiń azamattyǵyn alǵan Rıdder qalasynyń turǵynyn anyqtady. Alaıda ol bul týraly QR zańnamasynda belgilengen merzimde habarlamaǵan jáne Qazaqstan Respýblıkasy azamatynyń qujattaryn memlekettik organdarǵa tapsyrmaǵan. Rıdder qalasynyń ákimshilik sotynyń sheshimimen sheteldik áıel elden shyǵaryldy», - delingen aqparatta.
Osy rette, Kóshi-qon qyzmeti QR Konstıtýtsııasyna sáıkes elde qos azamattyqqa jol berilmeıtinin eskertedi. Zańdy saqtamaǵan azamat QR Ákimshilik quqyq buzýshylyq týraly Kodeksiniń 496-babyna sáıkes ákimshilik jaýapkershilikke tartylady. Bul 100-den 200 AEK mólsherinde aıyppul salynýyna jáne onyń Qazaqstan Respýblıkasynan tys jerge shyǵarylýyna ákelip soqtyrady.
