Shyǵys Qazaqstanda koronavırýstan kóz jumǵandar sany 4 esege azaıdy
ÓSKEMEN. QazAqparat – Shyǵys Qazaqstan oblysynda bıyl koronavırýstan kóz jumǵandar sany ótken jylmen salystyrǵanda birshama azaıǵan, dep habarlaıdy QazAqparat tilshisi.
Óńir boıynsha jyl basynan beri koronavırýs ınfektsııasynan qaıtys bolǵandar sany ótken jylǵy kezeńmen salystyrǵanda 4 esege azaıǵan. Bul jaıly ShQO Aqparat ortalyǵynda ótken baspasóz brıfıngi barysynda oblystyq Densaýlyq saqtaý basqarmasynyń basshysy Ermek Omarbekov málim etti.
«Koronavırýs pandemııasy bastalǵaly beri oblysta 34 729 naýqas tirkelgen. Qaýipti dertten kóz jumǵandar sany byltyr 300 adamdy qurady. Al bıyl qaıǵyly jaǵdaılar azaıǵan. Naqty aıtqanda, jyl basynan beri vırýstan 72 adam qaıtys boldy», - dedi ol.
Ermek Omarbekovtyń aıtýynsha, qazir óńirde koronavırýstyń «delta» shtammy taralyp jatyr. Ol burynǵy shtammdarǵa qaraǵanda qaýiptirek.
