Shyǵys Qazaqstanda koronavırýs juqtyrǵandar sany azaıyp keledi

ÓSKEMEN. QazAqparat – Shyǵys Qazaqstan oblysynda koronavırýs juqtyrǵandar sany azaıyp keledi, dep habarlaıdy QazAqparat tilshisi.

Aımaq basshysy Danıal Ahmetov qala jáne aýdan ákimderimen koronavırýsqa baılanysty ahýal boıynsha kezekti keńes ótkizdi.

Ákimniń aıtýynsha, kórshi elderde naýqastardyń sany artyp, ólim-jitim deńgeıi ósken. Alaıda oblysta qaýipti dertke shaldyqqandar sany kún saıyn azaıyp keledi.

«Sońǵy táýlikte Shyǵys Qazaqstanda vırýs juqtyrǵan turǵyndar sany júzden az boldy. Bul indetke qarsy kúreste bar kúsh-jigerin salyp jatqan dárigerler men jaýapty mamandar jumysynyń arqasy. Eger jaǵdaı osy qalyptan taımaı, ary qaraı rettelse, óńir «jasyl aımaqqa» ótýi múmkin», - dedi ol.

Óz sózinde Danıal Ahmetov vaktsınanyń koronavırýstan qutylýdyń jalǵyz tıimdi joly ekendigin eske salyp, qala, aýdandarda osy baǵytta jumysty kúsheıtý kerektigin jetkizdi.