Shyǵys Qazaqstanda kóldiń arǵy betine júzip jetpek bolǵan jas jigit sýǵa ketti
ÓSKEMEN. QazAqparat - Shyǵys Qazaqstan oblysynda eki adam sýǵa ketti, dep habarlaıdy QazAqparat oblystyq tótenshe jaǵdaılar departamentiniń baspasóz qyzmetine silteme jasap.
Vedomstvonyń málimetinshe, 1 tamyz kúni bir top jastar Borodýlıho aýdanyndaǵy Jernovskoe kóline shomylýǵa barǵan. Onyń ishinen birneshe jigit kóldi kesip ótip, arǵy betine deıin júzip barmaq bolǵan. Bir jigit basqalardyń sońynda qalyp qoıyp, sýǵa batyp ketken.
«Jigitter ony baıqaǵannan keıin birden polıtsııa men qutqarýshylardy shaqyrǵan. Sosyn ózderi kól astynan jigittiń denesin izdep taýyp, jaǵaǵa shyǵarǵan jáne sosyn polıtseılerge tapsyrǵan. Osy kúni órt sóndirý bóliminiń qyzmetkerleri osy mańda patrýl júrgizgen bolatyn, alaıda olar aralaǵan kezde munda eshkim bolmaǵan» dep túsindirdi departamentten.
Sondaı-aq, Semeı qalasynyń jedel qutqarý jasaǵy beımálim jaǵdaıda Ertis ózenine batyp ketken 1986 jylǵy er adamnyń denesin 4 táýlikten beri taba almaı jatqan bolatyn. Osy kúni marqumnyń máıiti jaǵaǵa shyǵaryldy.
«Jigittiń denesin qaıǵyly oqıǵa bolǵan jerden 30 shaqyrym qashyqtyqtan balyqshylar taýyp aldy» dep málim etti TJD.
Eske sala keteıik, shomylý maýsymy bastalǵaly beri Shyǵys Qazaqstan oblysynda 28 adam sýǵa ketken. Onyń segizi - balalar.
