Shyǵys Qazaqstanda keıingi bes kúnde dalada 11 ret órt shyqty

ÓSKEMEN. QazAqparat – Shyǵys Qazaqstan oblysynda sońǵy bes kúnde 11 dala órti shyqty, dep habarlaıdy QazAqparat tilshisi.

ShQO Tótenshe jaǵdaılar departamenti baspasóz qyzmetiniń málimetine súıensek, óńir aýmaǵynda 30 naýryz ben 3 sáýir aralyǵynda 11 dala órti shyqty. Órt sóndirýshiler jalpy aýdany 3 gektardan asatyn qyzyl jalyndy aýyzdyqtaǵan.

«Órt qaýpi joǵary kezeńde ashyq alańda shóptiń janýyn baqylap otyrý úshin qutqarýshylar ǵaryshtan monıtorıng jasaıdy. Termonúkteler arqyly ot shyqqanyn bilip, shuǵyl túrde oqıǵa ornyna attanady. Osylaısha, tilsiz jaýdyń ary qaraı taralýyna jol bermes úshin tıisti sharalar qabyldanady», - dep habarlady vedomstvo ókilderi.

Osy rette, TJD mamandary órt qaýpi joǵary kezeńde kelesi erejelerdi qatań saqtaý qajettigin eske salady:

- Ashyq alańda shóp órtemeńiz.

- Ormanda ot jaǵýǵa bolmaıdy.

- Balalarǵa otpen jáne sirińkemen oınaýdyń qaýpin túsindirý qajet.

- Kólikpen kele jatqanda sóndirilmegen temeki tuqylyn terezeden syrtqa laqtyrmańyz.