Shyǵys Qazaqstanda keshe shyqqan dala órtiniń beti qaıtty
ShQO ákimdiginiń málimetine súıensek, keshe Altaı aýdany Severnoe aýylynan 10 shaqyrym jerde bastalǵan órt qazirgi ýaqytta tolyqtaı oqshaýlandy.
«Severnoe men Serebrıansk eldi mekenderine qaýip tóngen joq. Órt sóndirýge 152 adam jumyldyryldy. Onyń ishinde oblystyq TJD qyzmetkerleri, arnaıy qurylǵan tabıǵı resýrstar jáne tabıǵatty paıdalanýdy retteý basqarmasynyń avıaotrıady bar. Órttiń aýdany 23 gektardy quraǵan», - dedi oblys ákimi Danıal Ahmetov.
Tilsiz jaý shóp pen butany sharpyǵan. Qutqarýshylar kezekshilikte qalady, óıtkeni sınoptıkterdiń boljamy boıynsha búgin jyldamdyǵy sekýndyna 21 metrge jetetin qatty jel bolýy múmkin.
«Qazir onda sý tógetin qurylǵylary bar eki tikushaq jumys isteýde. Órtti sóndirýge qatysqandardyń barlyǵy qajetti zattarmen qamtamasyz etilgen. Kún saıyn áýe patrýlderi baqylaý júrgizýde. Aımaqta ystyq, qurǵaq aýa raıy ornap, órt qaýpiniń joǵary 5 klasy jarııalandy. Barlyq jaǵdaı baqylaýda», - dedi D.Ahmetov.
Eske salsaq, osyǵan deıin ShQO-da 100-den astam adam qatty jel saldarynan dala órtin aýyzdyqtaı almaı jatqany habarlanǵan.